अमळनेर: संत सखाराम महाराज औद्योगिक प्रशिक्षण संस्था, अमळनेर येथील इलेक्ट्रिशियन विभागातील विद्यार्थी विवेकानंद महेंद्र बडगुजर याने जळगाव येथे दिनांक 5 मार्च 2025 रोजी झालेल्या “महाकुंभ क्रीडा स्पर्धा” मध्ये पंजा लढवण्याच्या स्पर्धेत जिल्ह्यात प्रथम क्रमांक पटकावला. या भव्य यशामुळे त्याची विभागीय स्तरावरील स्पर्धेसाठी निवड झाली आहे.
पत्रकार कुटुंबातील खेळाडूची मोठी झेप
विवेकानंद बडगुजर हा अमळनेर येथील ज्येष्ठ पत्रकार जगन्नाथ बडगुजर यांचा नातू आणि अटकाव न्यूजचे संपादक हितेंद्र बडगुजर यांचा पुतण्या आहे. त्याच्या या विजयामुळे संपूर्ण कुटुंबासह संस्थेचे शिक्षक, प्रशिक्षक आणि विद्यार्थ्यांमध्ये आनंदाचे वातावरण पसरले आहे.
संस्थेच्या मार्गदर्शनाचा मोठा वाटा
संत सखाराम महाराज औद्योगिक प्रशिक्षण संस्थेतील शिक्षकांनी नेहमीच विद्यार्थ्यांना मोलाचे मार्गदर्शन केले, त्यामुळेच विवेकानंदने ही मोठी कामगिरी साधली. या यशाचे श्रेय त्याने संस्थेचे प्राचार्य ए.बी. देव, गटनिर्देशक श्री. वी.पी. वाणी, निदेशक श्री. ए. डब्ल्यू. दुसाने, सौ. बिराडे मॅडम, सौ. इंगळे मॅडम, निकम मॅडम, श्री. सचिन महाजन सर, श्री. साईप्रसाद सर, श्री. माळी सर, श्री. सागर पाटील सर, मासरे मॅडम, ज्योती दुबे मॅडम, श्री. दगडू पाटील, श्री. मनोज चव्हाण, श्री. चेतन जावडेकर, श्री. महाले सर यांना दिले आहे.
पारंपरिक खेळांना मिळतोय नव बळ
छत्रपती शिवाजी महाराज यांच्या राज्याभिषेकाला 350 वर्षे आणि पुण्यश्लोक अहिल्याबाई होळकर यांच्या 300 व्या जयंतीनिमित्त “खेलो भारत, खेलेगा युवा, जितेगा भारत” या संकल्पनेतून महाराष्ट्र राज्याच्या व्यवसाय शिक्षण व प्रशिक्षण संचालनालयाच्या मार्गदर्शनाखाली जिल्हास्तरीय महाकुंभ क्रीडा स्पर्धांचे आयोजन करण्यात आले होते. यामध्ये पंजा लढविणे, दंड बैठक, पावनखिंड दौड, लेझीम, लगोरी, कबड्डी, लंगडी, रस्सीखेच, फुगडी, विटी-दांडू आणि खो-खो यांसारख्या पारंपरिक खेळांचा समावेश करण्यात आला होता.
या स्पर्धेचे उद्घाटन मंत्री गिरीश महाजन (जलसंपदा व आपत्ती व्यवस्थापन) यांच्या प्रमुख उपस्थितीत झाले. तसेच मंत्री मंगल प्रभात लोढा (कौशल्य, रोजगार, उद्योजकता व नावीन्यता) यांच्या संकल्पनेतून ही स्पर्धा आयोजित करण्यात आली होती.
विजयी खेळाडूंना सन्मान
या स्पर्धेतील विजयी खेळाडूंना प्रमाणपत्रांसह आकर्षक पुरस्कार देण्यात येणार आहेत. विवेकानंद बडगुजरच्या या यशामुळे त्याच्या पुढील वाटचालीसाठी शुभेच्छांचा वर्षाव होत आहे.
विभागीय स्तरावरही यशस्वी होण्याच्या निर्धाराने विवेकानंद अधिक जोमाने सराव करत आहे. त्याच्या या ऐतिहासिक कामगिरीमुळे संपूर्ण अमळनेरचा अभिमान वाढला आहे.
